لە دیدارێكدا باس لە پتەوكردنی پەیوەندییە بازرگانیەكانی نێوان وڵاتی هیندستان و هەرێمی كوردستان كرا.

كونسوڵی هیند سەرەتا پیرۆزبایی یادی یۆبیلی ژوور لە سەرۆك و ئەندامانی ژوور  كرد و هیوای سەركەوتنی زیاتری بۆ خواستن، وتی: ئێمە هەمیشە هەوڵمانداوە پەیوەندییەكی پتەوی بازرگانی لە نێوان ئێمە و هەرێمی كوردستان دروست بكەین، خۆشبەختانە ئێستا ئاڵوگۆڕی بازرگانی لە نێوان هەردوولا لە ئاستێكی بەرز دایە لە هەوڵی پەرەپێدانی زیاتر داین.

دیپات میگلانی وتیشی: جێگای خۆشحاڵی ئێمەیە كە دەبینین خواست لەسەر بەرهەمانی وڵاتەكەمان هەیە، وە چەندین كۆمپانیاشمان لە هەرێم كاردەكەن و سوپاس بۆ خواش تائێستاش هیچ كێشەیەك دروست نەبووە.

د. دارا جەلیل خەیات دوای بەخێرهێنان سوپاسی كرد بۆ ئەو هەوڵانەی كە لە پێناو پتەوكردنی پەیوەندی بازرگانی نێوان هیند و هەرێم دەیكەن، وتی: هیندستان وڵاتی گرنگە بۆ بازرگانی بەهۆی كوالێتی بەرزی كاڵاكانی و هەرزانی نرخەكەی، عێراق و هەرێمی كوردستان هەر لە كۆنەوە ئاڵوگۆڕی بازرگانی باشی هەبووە لەگەڵ وڵاتی هیندستان بە تایبەت لە بوارەكانی تەندروستی ، خۆراك و قوماش، سەرۆكی ژوور هیواشی خواست كە بە هەوڵی هەردوولا بتوانن پەیوەندییەكان بەرەوە پێشتر ببەن و وە پەیوەندی لە نێوان ژوورە بازرگانیەكانی هەردوولا دروست بكەن.