تۆ لێرەیت: ErbilChamberبابه‌ت فلته‌ر كراوه‌ به‌پێی به‌روار: چوار شەممە, 27 شوبات 2013

رێککه‌وتی 26/2/2013، به‌ڕێز دارا جه‌لیل خه‌یات سه‌رۆکی  ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌به‌ڕێزان  پۆڵ ساتفن کۆنسوڵی گشتی و، مارتن هیلی به‌رپرسی پاشکۆی ئابووری له‌‌کونسوڵخانه‌ی ویلایه‌ته‌ یه‌کگرتووه‌کانی ئه‌مه‌ریکا له‌هه‌ولێر و شاندی یاوه‌ریانی کرد.

 

له‌سه‌ره‌تای دیداره‌که‌دا، ‌تیایدا به‌ڕێز سۆران ئه‌بوبه‌کر عه‌زیز جێگری سه‌رۆکی ژوور و، ژماره‌یه‌ک له‌ئه‌ندامانی ده‌سته‌ی کارگێڕی ژوور ئاماده‌یبوون، به‌ڕێز دارا جه‌لیل خه‌یات به‌گه‌رمی به‌خێرهێنانی شاندی میوان کرد و هیوای سه‌رکه‌وتنی بۆ خواستن له‌ئه‌رکه‌کانیاندا.

 

هه‌روه‌ها به‌ڕێزیان وتی:"هیوادارین که‌ بوونی کونسوڵخانه له‌کوردستاندا ببێته هۆی پێشخستنی په‌یوه‌ندییه‌ ئابووری و بازرگانییه‌کانی نێوان هه‌رێمی کوردستان و ئه‌مه‌ریکا و، ئێستا کوردستان خاوه‌ن بودجه‌ی باشه‌ و، له‌و باوه‌ڕه‌داین که‌ ده‌کرێت له‌گه‌ڵ وڵاتانی پێشکه‌وتوودا کاری بازرگانی بکه‌ین و له‌وانیش ئه‌مه‌ریکا که‌ خاوه‌نی توانا و شاره‌زایی زۆر و ته‌کنه‌لۆجیای پێشکه‌ووتووه‌ له‌هه‌موو بواره‌کاندا."

 

هاوکات به‌ڕێزیان داوای کرد که‌ ئه‌نجومه‌نێكی فراوانی بزنس له‌نێوان خاوه‌نکارانی کوردستان و ئه‌مه‌ریکادا دروست بکرێت، تاکو له‌رێیه‌وه‌ بازرگانان و سه‌رمایه‌گوزارانی هه‌ردوولا به‌یه‌کتری ئاشنا بن، ‌تا ببێته‌ هۆیه‌ک بۆ ئه‌وه‌ی وه‌به‌رهێنه‌رانی ئه‌مه‌ریکا روو له‌کوردستان بکه‌ن، به‌تایبه‌ت ئه‌وانه‌ی که‌له‌بواری فێرکردن و ته‌ندروستی و خزمه‌تگوزاری  کار ده‌که‌ن."

 

لای خۆیه‌وه‌، به‌ڕێز پۆڵ ساتفن کۆنسوڵی گشتی ئه‌مه‌ریکا وێڕای ده‌ربڕینی سوپاسگوزاری خۆی و ئه‌ندامانی شاندی میوانی له‌به‌رامبه‌ر پێشوازیکردنیاندا، وتی:"خۆشحاڵم که‌ له‌کوردستاندا نوێنه‌ری ئه‌‌مه‌ریکام و خۆشحاڵیشم به‌هاتنم بۆ ژووری بازرگانی."

 

هه‌روه‌ها وتی:"له‌کوردستاندا کارێكی زۆر کراوه‌ و پێشکه‌وتنی باش هاتۆته‌ دی و، هه‌روه‌ها بازرگانانی هه‌رێم خاوه‌ن توانای باشن، بۆیه‌ پێمان وایه‌ که‌  هیچ ناوچه‌یه‌کی عێراق وه‌ک هه‌رێمی کوردستان به‌ره‌و پێش نه‌چووه‌ له‌رووی ئابوورییه‌وه‌، ئێمه‌ش وه‌کو کونسوڵخانه هه‌وڵ ده‌ده‌ین که‌ خاوه‌نکارانی کوردستان و ئه‌مه‌ریکا به‌یه‌کتر بگه‌یه‌نین و، ‌ئه‌مه‌ش کار و هه‌وڵێكی زۆری ده‌وێت."

 

هاوکات به‌ڕێزیان دووپاتی کرده‌وه‌ که‌له‌هه‌وڵدان بۆ ئه‌وه‌ی که‌ خزمه‌تگوزاری پێدانی  راسته‌وخۆی ڤیزا به‌خاوه‌نکاران و هاووڵاتییانی کوردستان له‌مانگی ئایاری داهاتوودا ‌له‌کونسوڵخانه ده‌ست پێ بکات.

 

هه‌روه‌ها ئاماژه‌ی به‌وه‌شدا، که‌ له‌مه‌وپاش کونسوڵخانه‌ کار له‌سه‌ر روونکردنه‌وه‌ی ته‌واوی ره‌وشی کوردستان بۆ بازرگانانی ئه‌مه‌ریکا ده‌کات، تاکو ره‌زامه‌ندی ده‌ربڕن به‌هاتنیان بۆ کوردستان.

 

راشیگه‌یاند که‌ ئێستا هه‌ردوو فڕۆکه‌خانه‌ی هه‌ولێر و سلێمانی له‌ئه‌مه‌ریکا ‌وه‌کو دوو فڕۆکه‌خانه‌ی شیاو بۆ نیشتنه‌وه‌ی فڕۆکه‌ ئه‌مه‌ریکییه‌کان په‌سه‌ندکراون‌.  

       

پاشان به‌ڕێز سۆران ئه‌بوبه‌کر جێگری سه‌رۆکی ژوور و، ئه‌ندامانی ده‌سته‌ی کارگێڕی، چه‌ندین سه‌ر‌نج و تێبینی خۆیان خسته‌ روو و به‌گشتی ئاماژه‌یان به‌وه‌دا که‌ کوردستان جیاوازه‌ له‌گه‌ڵ پارچه‌کانی دیکه‌ی عێراقدا، ئه‌م هه‌رێمه‌ خاوه‌ن ئاسایشه‌ و سه‌قامگیری ئابووری هه‌یه‌ و کوردستان له‌ناوچه‌که‌دا دیاره‌ و پێگه‌ی خۆی هه‌یه‌، بۆیه‌ زۆر پێویسته‌ که‌ کۆمپانیاکانی خاوه‌ن مارکه‌ به‌ناوبانگه‌کانی ئه‌مه‌ریکا له‌بواره جۆراجۆره‌کاندا روو بکه‌نه‌ کوردستان.‌  

 

له‌کۆتایی دیداره‌که‌شدا، به‌ڕێز دارا جه‌لیل خه‌یات سه‌رۆکی ژوور ، دیاری ژووری پێشکه‌ش به‌به‌ڕێز کونسوڵ و ئه‌ندامانی شاندی میوان کرد.

بڵاوكراوه‌ته‌وه‌ له‌ هه‌واڵ
چوار شەممە, 27 شوبات 2013 08:30

گازپڕۆم سێیەم كێڵگەی لە هەرێم وەرگرت

گازپڕۆم سێیەم كێڵگەی لە هەرێم وەرگرت
 
سایتی هه ولێر

بڕیارە لە داهاتوویەكی نزیكدا كۆمپانیای "گازپرۆم نەفت"ـی ڕووسی دەست بە دەرهێنانی نەوت لە سێیەم كێڵگەی لە هەرێمی كورستاندا بكات.

ئەو كێڵگەیەی كە بڕیارە گازپرۆم كاری لێ بكات، ناوەكەی ئاشكرا نەكراوە.
"گازپرۆم نەفت" ڕێژەی 80%ـی ئەو كێڵگەیەی كڕیوە كە ناوەكەی ئاشكرا نەكراوە و بەشەكەی دیكەیش حكوومەتی هەرێم خاوەنییەتی.

جێگری سەرۆكی جێبەجێكاری كۆمپانیاكەیش ڤادیم یاكۆڤلیڤ لەگەڵ پشتڕاستكردنەوەی هەواڵەكە، ڕایگەیاندووە كە وەرگرتنی ئەو كێڵگە نەوتییە نابێتە هۆی دروستبوونی هیچ كێشەیەك لەگەڵ حكوومەتی بەغدا.

ڤادیم یاكۆڤلیڤ لە ڕێگەی فاكسێكەوە ئەوە دووپات دەكاتەوە كە كۆمپانیاكەیان بەردەوام دەبێت لە كاركردن لەگەڵ هەرێمی كوردستان و بە دووریشی دەزانێت ئەم بۆندانەی لەگەڵ هەرێم مۆریان كردوون، زیان بە پێوەندییەكانی ئەوان و بەغدا بگەیەنێت.

بەغدا چەند جارێك كۆمپانیای گازپرۆمی ئاگادار كردووەتەوە كە پاشگەز ببێتەوە لەو بۆندانەی لەگەڵ وەزارەتی سامانە سرووشتییەكانی هەرێم مۆری كردوون و لە بەرانبەردا پەرە بە كێڵگەی نەوتیی بەدرە لە خوارووی عێراق بدات، بە پێچەوانەی ئەمەیش ئێستا كۆمپانیا ڕووسییەكە بە هاوبەشیی كۆمپانیای دیكە لە دوو كێڵگەی دیكە لە هەرێم كار دەكات. ئەمە سێیەم كێڵگەیە كە گازپرۆم كاری تێدا دەكات.


كۆمپانیای گازپرۆم
گازپرۆم پێنجەم گەورەترین كۆمپانیای ڕووسیایە و بارەگای سەرەكی لە شاری سان پێتسبۆرگی ڕووسیایە. لە ئەگۆستی ساڵی ڕابردوو دوو بۆندی لەگەڵ وەزارەتی سامانە سرووشتییەكان مۆر كردووە، یەكێكیان لە ناوچەی گەرمیانە بە هاوبەشی لەگەڵ كۆمپانیای ویستێرن زاگرۆس، ئەوی دیكەیش لە ناوچەی شەكال. كۆمپانیاكە كە لە هەر دوو بواری دەرهێنانی نەوت و گاز كار دەكات، خاوەنی كێڵگەیەكی نەوتیشە لە خوارووی عێراق بە ناوی بەدرە.

گازپرۆم و چەند كۆمپانیایەكی دیكەی جیهانی وەك ئێكسۆن و شیڤرۆن بە هۆی بوونی بۆند لەگەڵ هەرێم، كێشەیان لەگەڵ حكوومەتی بەغدا هەیە. حكوومەتی عێراقیش ئامادە نییە پارەی ئەو كۆمپانیایانە بدات كە لە هەرێم كار دەكەن.

 
بڵاوكراوه‌ته‌وه‌ له‌ هه‌واڵی ئابووری

بڵاوکراوه‌کان

ڕۆژنامه‌ی بازرگانی سه‌رده‌م

ڕێبه‌ری ژوور

هه‌واڵی چاوه‌ڕوانكراو

سعر الصرف

به‌های گۆرینه‌وه‌ی دیناری عیراقی به‌ دولاری ئه‌مری...

«
»
« May 2021 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

نرخی دراو

نرخی دراو

کەشوهەوای هه‌ولێر

ئاگاداری

Copyright © 2012 Erbil Chamber. All Rights Reserved. سه‌ره‌وه‌ ↑